Euskadiko Ekonomia eta Gizarte Arazoetarako Batzordeko gardentasun atariaren asmoa da herritarrei aldian behin euren jarduerekin zerikusia duten jarduketa publikoaren kontrolari eta funtzionamenduari buruzko informazio eguneratua ematea, Gardentasunari, Informazioa Eskuratzeari eta Gobernu Onari buruzko abenduaren 9ko 19/2013 Legean xedatutakoa betez.

ERAKUNDE INFORMAZIOA:
Euskadiko Ekonomia eta Gizarte Arazoetarako Batzordea 1995eko urriaren 11n sortu zen, eta gaur egun maiatzaren 17ko 8/2012 Legeak arautzen du. Horren arabera, Euskadiko Ekonomia eta Gizarte Arazoetarako Batzordeak ezaugarri hauek ditu:

• Gobernuaren eta Legebiltzarraren erakunde aholku-emailea da, Euskal Herriko ekonomia- eta gizarte-interes ezberdinek ekonomia- eta gizarte-politikan esku har dezaten.
• Batzordeak nortasun juridiko propioa du, Euskal Autonomia Erkidegoko administrazioarena ez bezalakoa.
• Eusko Jaurlaritzari eta Eusko Legebiltzarrari dagokienez autonomia eta independentzia osoz garatzen ditu bere eginkizunak.
• Araudia
• Osaera
• Kargu publikoak

- Presidentea: Emilia M. Málaga Pérez
- Idazkari nagusia: Lorea Soldevilla Palazuelos

Euskadiko Ekonomia eta Gizarte Arazoetarako Batzordeak eginkizun hauek ditu:

1. Politika ekonomikoarekin eta sozialarekin loturiko lege proiektuei buruzko aginduzko informazioa ematea, Laneko Harremanen Batzordeari atxikitako arloak alde batera utzita, hura arautzen duen legearen arabera. Halaber Euskal Autonomia Erkidegoko aurrekontu orokorren lege proiektuak salbuetsita daude, baita berau aldatzeko edo osatzeko legegintzako arauak ere.
2. Politika ekonomikoarekin eta sozialarekin loturiko lege proiektuei buruzko aginduzko informazioa ematea, Laneko Harremanen Batzordeari atxikitako arloak alde batera utzita, Eusko Jaurlaritzaren ustez garrantzi berezikoak badira. Horrez gain, aurreko ekitaldietan onetsitakoen jarraipena dakarten dekretu proiektuak edo aldaketa nabarmenak ez dakartenak ere salbuetsita daude.
3. Informazioa ematea Eusko Jaurlaritzak hartutako beste edozein administrazio ebazpenen inguruan, politika ekonomiko eta sozialarekin lotuta badaude eta Laneko Harremanen Batzordeari bere lege arau-emailean dagozkion arloak alde batera utzita, betiere Eusko Jaurlaritzaren ustez garrantzi berezikoak badira.
4. Informazioa ematea aginduz Eusko Jaurlaritzak politika ekonomiko eta sozialaren arloan dituen plan orokorrei buruz.
5. Aurreko ataletan aipaturiko arloei buruzko proposamenak egitea Eusko Jaurlaritzari.
6. Bere ekimenaz edo Eusko Jaurlaritzak edo Legebiltzarrak eskatuta irizpenak, ebazpenak edo txostenak egitea, aurreko a) eta b) ataletan aipaturiko arloei dagozkienak.
7. Eusko Jaurlaritzak Euskal Autonomia Erkidegoko sektore publikoaren jarduera ekonomikoei buruz eginiko plangintzan parte hartzea.
8. Memoria bat egitea eta Eusko Jaurlaritzaren eta Eusko Legebiltzarraren irizpenpean jartzea, non Euskal Autonomia Erkidegoko egoera ekonomikoari eta sozialari buruzko bere gogoetak azalduko diren.
9. Bere eginkizunak betetzeko behar duen informazioa eskatzea eta jasotzea administrazio orokorretik eta Euskal Autonomia Erkidegoko edozein erakundetatik.

INFORMAZIO EKONOMIKOA:
Aurrekontua
Autonomia ekonomiko finantzarioaren printzipioa betez, urtero bere aurrekontua onetsi eta betearazten du Batzordeak, eta Euskal Autonomia Erkidegoko Aurrekontu Orokorretan ezarritako kopuruekin finantzatzen da.

• Aurrekontuaren laburpena
• Gastuen aurrekontuaren betearazpenaren laburpena
• Diru-sarreren aurrekontuaren betearazpenaren laburpena

Lansari-erregimena eta kalte-ordainketak
Batzordea arautzen duen legearen 21. artikuluari jarraiki, batzordearen osoko bilkurak ezartzen duen lansaria jasoko du batzordeburuak; kopuru horrek ez du inolaz ere gaindituko Eusko Jaurlaritzako sailburuordearen kargurako ezarritako lansaria. 2019. urterako 83.497,12 euro gordin izango da. Idazkari nagusiak batzordeko osoko bilkurak ezartzen duen lansaria jasoko du; kopuru horrek ez du inolaz ere gainditu Eusko Jaurlaritzako zuzendariaren kargurako ezarritako lansaria. 2019. urterako 71.200,08 euro gordin izango da. Osoko Bilkurak onetsiko ditu aholkulariek jaso ditzaketen esleipen ekonomikoak, batzordeko eginkizun propioak burutzeko dedikazioak edo bertaratzeak sortzen dizkien gastuak ordaintzeko.

Batzordeko langileen erregimena
Batzordeak zortzi langile ditu, batzordeari lotuta daudenak, araudian jaso den moduan, lan eskubidearen menpeko harreman baten bidez. Langileen hautaketa deialdi publiko bidez egiten da, merezimendu eta gaitasunaren printzipioetan oinarritutako sistemen bidez.

Kontratazioa:

• Administrazio-kontratazio taula
• Kontratatzailearen profila